Mashhur geymer Vins Zampella avtohalokatda vafot etdi
Kaliforniya shtatidagi San-Gabriel tog‘larida sodir bo‘lgan og‘ir yo‘l-transport hodisasi butun dunyo geymerlari va IT sohasidagi jamoatchilikni larzaga soldi. Bu haqda Zamin.uz xabar berdi.
Mashhur videoo‘yin ishlab chiquvchisi, sohada katta iz qoldirgan Vins Zampella 55 yoshida hayotdan ko‘z yumdi. Mahalliy manbalarning xabar berishicha, Zampellaga tegishli Ferrari avtomobili tunneldan chiqqan joyda boshqaruvni yo‘qotib, beton to‘siqqa urilgan.
Kuchli zarba natijasida avtomobil yong‘inga o‘ralgan. Hodisa joyida Zampella halok bo‘lgan, avtomobil ichidagi yo‘lovchi esa og‘ir jarohat olib kasalxonaga yetkazilgan, ammo uning hayotini saqlab qolishning imkoni bo‘lmagan.
Vins Zampella videoo‘yinlar tarixida muhim o‘rin egallaydi. U Infinity Ward studiyasining asoschilaridan biri bo‘lib, aynan shu jamoa orqali afsonaviy Call of Duty o‘yinlar seriyasi yaratilgan.
Ushbu loyiha yillar davomida millionlab geymerlarning e’tiborini qozonib, janr rivojiga katta turtki bergan. Zampella keyinchalik Respawn Entertainment kompaniyasiga asos solib, Titanfall va Apex Legends kabi mashhur o‘yinlarni yaratishda boshchilik qilgan.
So‘nggi yillarda esa u Electronic Arts kompaniyasi tarkibida ishlagan va Battlefield seriyasining rivojlanish jarayonlariga rahbarlik qilgan. Electronic Arts kompaniyasi Zampellaning vafotini tasdiqlab, uni videoo‘yinlar dunyosini o‘zgartirgan ilhomlantiruvchi shaxs sifatida e’tirof etdi.
Kompaniya bayonotida: “Bu biz uchun o‘rnini to‘ldirib bo‘lmas yo‘qotish. Bizning qalblarimiz Vinsning oilasi va yaqinlari bilan birga”, — deyiladi.
Hozirda politsiya hodisaning sabablarini o‘rganmoqda. Tergovchilar avtomobilning tog‘ yo‘lida boshqaruvdan chiqib ketishiga texnik nosozlik yoki boshqa omillar sabab bo‘lgan-bo‘lmaganini aniqlash ustida ish olib bormoqda.
Shubhasiz, Vins Zampellaning nomi videoo‘yinlar tarixida abadiy qoladi. U yaratgan o‘yinlar esa yana uzoq yillar davomida insonlarga zavq ulashishda davom etadi.
