Isroil nazorati ostidagi G‘arbiy Sohilda yahudiy ko‘chmanchilarining yangi aholi punktlari tashkil etish jarayoni tezlashmoqda. Bu haqda Zamin.uz xabar berdi.
Xalqaro axborot manbalariga ko‘ra, bu hududlarda qurilayotgan kichik posyolkalar vaqt o‘tishi bilan yirik yashash joylariga aylanyapti. Mutaxassislarning fikricha, bu holat Falastin davlati tuzilishiga jiddiy to‘sqinlik qilmoqda.
Mahalliy falastinlik oilalar ko‘chmanchilar tomonidan uyushtirilayotgan hujumlar sababli o‘z uylarini tark etishga majbur bo‘lishmoqda. Ayrim hududlarda uylar yoqib yuborilgan, chorva mollari olib ketilgan.
Birlashgan Millatlar Tashkiloti ma’lumotlariga ko‘ra, 2025-yilda yuzlab falastinliklar bunday hujumlar oqibatida jarohat olgan. Hisobotlarga ko‘ra, joriy yilda G‘arbiy Sohilda 80 ta noqonuniy aholi punkti tashkil etilgan.
Isroil hukumati ayrim posyolkalarni keyinchalik rasmiy maqomga ega qilib, qonuniylashtirmoqda. Hukumat vakillari bu siyosatni xavfsizlik bilan izohlamoqda, biroq xalqaro tashkilotlar bunga tanqidiy yondashmoqda.
Xalqaro hamjamiyat G‘arbiy Sohildagi noqonuniy aholi punktlarini xalqaro qonunlarga zid deb baholamoqda. Huquq himoyachilarining ta’kidlashicha, ko‘chmanchilar tomonidan sodir etilayotgan ko‘plab hujumlar bo‘yicha yetarlicha jiddiy choralar ko‘rilmayapti.
