Rossiya neft eksporti so‘nggi ikki yil ichida eng yuqori darajaga chiqdi. Bu haqda Zamin.uz xabar berdi.
Bloomberg agentligi ma’lumotlariga ko‘ra, tankerlardan neft tushirishdagi kechikishlar sababli xomashyo zaxiralari to‘g‘ridan-to‘g‘ri kemalarda yig‘ilib qolmoqda. 21-dekabr holatiga ko‘ra, so‘nggi to‘rt hafta davomida Rossiyaning kunlik o‘rtacha neft eksporti hajmi 3,87 million barrelni tashkil etdi.
Bu ko‘rsatkich 2023-yil may oyidan beri qayd etilgan eng yuqori daraja hisoblanadi. Shuningdek, yo‘lda bo‘lgan tankerlarning bortida saqlanayotgan neft hajmi avgust oyidan buyon sezilarli darajada oshgan.
Ma’lumotlarga ko‘ra, bu hajm 48 foizga ko‘payib, 185 million barrelga yetdi. Agentlikning ta’kidlashicha, Rossiya nefti ortilgan kamida 20 dan ortiq tanker ayni paytda Xitoy va Hindiston portlariga kirish uchun ruxsat kutmoqda.
Ushbu vaziyat jahon neft tashish tizimidagi tirbandlik yanada kuchayganini anglatadi.
