Isroil armiyasi ma’lumotiga ko‘ra, G‘arbiy Sohilda yo‘l chetida ibodat qilayotgan falastinlik erkak avtomobil bilan urib yuborilgan. Bu haqda Zamin.uz xabar berdi.
Bu hodisani isroillik zaxiradagi askar sodir etgan. Dastlabki ma’lumotlarga ko‘ra, askar hodisadan oldin o‘q uzgan.
Ushbu voqea yuzasidan harbiylar bayonot berib, askarning o‘z vakolatlarini buzganini ta’kidlashgan. Mazkur shaxs zaxiradagi harbiy xizmatchi ekani aniqlanib, u xizmatdan chetlatilgan va quroli musodara qilingan.
Isroil ommaviy axborot vositalariga ko‘ra, u hozirda uy qamog‘ida saqlanmoqda. Hodisa natijasida jabrlangan falastinlik erkak tibbiy ko‘rikdan o‘tkazilgan va jiddiy jarohat olmagani aniqlangan.
U hozirda uyiga qaytgan. Falastin televideniyesida ushbu voqea aks etgan video namoyish etilgan bo‘lib, unda qurollangan shaxs avtomobil bilan ibodat qilayotgan odamni urib yuborgani tasvirlangan.
Birlashgan Millatlar Tashkilotining ma’lumotlariga ko‘ra, so‘nggi yillarda G‘arbiy Sohilda zo‘ravonliklar keskin ortgan. 2023-yil oktabridan 2025-yil oktabrigacha bo‘lgan davrda mingdan ortiq falastinlik va o‘nlab isroilliklar halok bo‘lgani qayd etilgan.
