Shveysariyada Yangi yil kechasida portlash: 40 halok bo‘ldi
Yangi yil kechasida Shveysariyaning Valais kantonidagi Kran-Montana chang‘i kurortida joylashgan barlardan birida portlash yuz berdi va ortidan yong‘in chiqdi. Bu haqda Zamin.uz xabar berdi.
Mahalliy matbuotning xabar berishicha, hodisa oqibatida 40 kishi halok bo‘lgan, yana 100 ga yaqin odam jarohat olgan. Jabrlanganlarning aksariyatida og‘ir kuyishlar qayd etilgan, ba’zilarining ahvoli og‘irligicha qolmoqda.
Hududdagi shifoxonalar imkoniyatlar chegarasida ishlamoqda. Jabrlanganlarni tezroq yetkazish maqsadida sanitariya vertolyotlari safarbar etilgan.
Shu bilan birga, kurort ustida vaqtinchalik havo qatnovi cheklangan. Voqea sodir bo‘lgan paytda Le Constellation klubida Yangi yil konserti bo‘lib o‘tayotgan edi.
Ushbu joy bir necha yuz kishi sig‘adigan maskan bo‘lib, yong‘in konsert davomida qo‘llangan pirotexnika sabab kelib chiqqani taxmin qilinmoqda. Huquq-tartibot organlari voqeani tergov qilmoqda, biroq hozircha bu hodisani terrorchilik hujumi sifatida baholashmayotganini ma’lum qilishdi.
Kran-Montana Shveysariyaning janubi-g‘arbiy qismida joylashgan mashhur Alp kurorti bo‘lib, u chang‘i trassalari, piyoda sayr yo‘llari va xalqaro sport musobaqalari bilan tanilgan. Ushbu voqea hududga katta zarar yetkazdi va mahalliy aholi hamda mehmonlar uchun og‘ir kechmoqda.
