Shveysariyada portlash: 40 kishi halok bo‘ldi
Shveysariyada Yangi yil bayrami arafasida fojiali hodisa sodir bo‘ldi. Bu haqda Zamin.uz xabar berdi.
1-yanvar kuni mamlakatning Vale kantonida joylashgan Kran-Montana tog‘-chang‘i kurorti hududida portlash yuz bergan va uning ortidan kuchli yong‘in kelib chiqqan. Hodisa mahalliy vaqt bilan soat 01:30 atrofida Le Constellation nomli barda sodir bo‘lgan.
Ushbu vaqtda barda 100 dan ortiq odam bo‘lgani ma’lum qilingan. Reuters agentligining Shveysariya politsiyasiga tayanib xabar berishicha, portlash oqibatida 40 ga yaqin kishi halok bo‘lgan, kamida 115 kishi tan jarohati olgan.
Politsiya tomonidan o‘tkazilgan matbuot anjumanida qurbonlar soni aniq aytilmagan, faqat "bir necha o‘nlab" odamlar halok bo‘lgani ta’kidlangan. O‘zbekiston Respublikasi Tashqi ishlar vazirligi ushbu fojia munosabati bilan Shveysariya xalqiga chuqur hamdardlik bildirdi.
Rasmiy ma’lumotlarga ko‘ra, jabrlanganlar orasida O‘zbekiston fuqarolari yo‘q. Hodisa sabablari yuzasidan tergov ishlari davom etmoqda.
