Yong‘inda jarohatlangan futbolchi Germaniyada davolanmoqda
Fransiyaning "Mes" futbol klubi himoyachisi Tairis Dos Santos Shveysariyada joylashgan Kran-Montana tog‘-chang‘i kurortida yuz bergan yong‘in oqibatida og‘ir kuyish jarohatlari oldi. Bu haqda Zamin.uz xabar berdi.
Klub matbuot xizmatining xabariga ko‘ra, 19 yoshli futbolchi hozirda Germaniyada davolanmoqda. Hodisa Yangi yil kechasida, kurortdagi barda sodir bo‘lgan.
Yong‘in katta talafotlarga olib kelib, taxminan 40 kishining hayotiga zomin bo‘lgan, 110 dan ortiq odam jarohat olgan. "Mes" klubi rasmiy bayonotida shunday deyiladi: "Klubimiz tarbiyalanuvchisi Tairis Dos Santos Kran-Montanadagi yong‘in oqibatida jiddiy jarohat oldi.
Futbolchi vertolyot yordamida Germaniyaga olib ketildi va hozirda davolanish jarayonidan o‘tmoqda. Klub rahbariyati, futbolchilar va barcha xodimlar bu fojiadan qattiq qayg‘uda.
Biz uning oilasiga to‘liq qo‘llab-quvvatlovimizni bildiramiz. Voqea yuzasidan qo‘shimcha ma’lumotlar bo‘lsa, albatta xabar qilamiz." Tairis Dos Santos hali "Mes"ning asosiy jamoasida debyut qilmagan bo‘lsa-da, yoshlar jamoasida o‘z iqtidorini namoyish etgan va e’tiborni tortgan edi.
