Ganada "payg‘ambar" deb atalgan shaxs qo‘lga olindi

Ganada o‘zini payg‘ambar deb e’lon qilgan va qiyomat yaqinligini targ‘ib qilgan Evans Eshun ismli shaxs qo‘lga olindi. Bu haqda Zamin.uz xabar berdi.

U o‘zini "Ebo Nuh" deb atab, insoniyatni qutqarish uchun kema qurishni boshlaganini ma’lum qilgan. Unga ko‘ra, 2025-yilning 25-dekabrida global suv toshqini boshlanishi kutilayotgan edi.

Ebo Nuh odamlarni ushbu falokatdan qutqarish uchun 10 ta zamonaviy kema qurishni va’da qilgan va buning uchun ko‘plab odamlarni o‘z g‘oyalariga ishontirishga harakat qilgan. Ammo Rojdestvo kuni hech qanday falokat yuz bermagach, Ebo Nuh Xudo uning ibodatlari tufayli suv toshqinini kechiktirgani haqida da’vo qilgan.

U o‘zining ijtimoiy tarmoqlardagi videolari orqali kema qurilishini nazorat qilayotganini ko‘rsatgan. Biroq uning bu harakatlari ijtimoiy tarmoqlarda keskin tanqidga uchradi.

Ko‘plab foydalanuvchilar uni jamoatchilikni aldashda va xavf tug‘dirishda ayblab, qonuniy choralar ko‘rishni talab qilishdi. Natijada mahalliy politsiya Ebo Nuhni qo‘lga oldi.

Ushbu voqea nafaqat Ganada, balki butun dunyoda, jumladan, o‘zbekistonliklar orasida ham katta e’tibor va muhokamalarga sabab bo‘ldi.