Janubiy Koreya va Xitoy do‘stlikni mustahkamlamoqda

Janubiy Koreya prezidenti Li Chje Myon Xitoyga rasmiy tashrifi davomida Xitoy Xalq Respublikasi raisi Si Szinpin bilan uchrashdi. Bu haqda Zamin.uz xabar berdi.

Uchrashuv chog‘ida ikki davlat rahbarlari birgalikda suratga tushdi. Ma’lum qilinishicha, ushbu suratni olish uchun Xitoy rahbari Janubiy Koreya prezidentiga sovg‘a qilgan Xiaomi smartfonidan foydalanilgan.

Bu holat suratga alohida ramziy ma’no bag‘ishlagan va uni yanada diqqatga sazovor qilgan. Prezident Li Chje Myon suratni ijtimoiy tarmoqlardan birida e’lon qilib, uni “esda qolarli lahza” deb atadi.

Shuningdek, u ikki mamlakat o‘rtasidagi do‘stlik va hamkorlikka oid iliq fikrlarini bildirib o‘tgan. “Biz bir-birimizga qanchalik yaqinlashsak, Koreya va Xitoy munosabatlari shunchalik mustahkamlanadi.

Kelgusida muloqotlarimiz yanada ko‘payadi va hamkorligimiz faollashadi”, — deya ta’kidladi Janubiy Koreya prezidenti.