2040-yilga borib misga talab 50% oshadi

2040-yilga kelib dunyoda misga bo‘lgan talab keskin oshishi kutilmoqda. Bu haqda Zamin.uz xabar berdi.

Yillik iste'mol 2025-yildagi 28 million tonnadan 42 million tonnagacha yetishi, ya'ni qariyb 50 foizga ko‘payishi mumkin. Bu haqda S&P Global hisobotiga asoslanib, Reuters xabar bergan.

Hisobotga ko‘ra, bu o‘sishning asosiy sabablari sun’iy intellekt texnologiyalarining rivojlanishi, mudofaa sohasidagi buyurtmalarning ortishi hamda robototexnika bozorining kengayishi bilan bog‘liq. Shu bilan birga, tahlilchilar mis qazib olish va uni qayta ishlash quvvatlari oshirilmasa, jiddiy tanqislik yuzaga kelishi mumkinligini ta’kidlamoqda.

Agar bu muammolar hal qilinmasa, mis yetishmovchiligi yiliga 10 million tonnadan oshib ketishi ehtimoli mavjud. Misga bo‘lgan talabning oshishiga mudofaa xarajatlarining ko‘payishi ham sabab bo‘lmoqda.

Rossiya va Ukraina o‘rtasidagi mojarolar davom etayotgani, shuningdek, Yaponiya, Germaniya va boshqa davlatlarning iqtisodiyotida harbiylashuv jarayonlari misga bo‘lgan ehtiyojni kuchaytirmoqda. Mis elektrlashtirish jarayonida asosiy metall bo‘lib qolmoqda.

U deyarli barcha elektron qurilmalarda, qurilishda va transport tizimlarida keng qo‘llanadi. Misning eng yirik ishlab chiqaruvchilari Chili va Peru bo‘lsa, Xitoy uni qayta ishlashda yetakchi hisoblanadi.

AQSh esa o‘zining misga bo‘lgan ehtiyojining qariyb yarmiga import orqali javob bermoqda. Hisobotda chuqur dengiz konlaridan olinishi mumkin bo‘lgan mis zaxiralari hisobga olinmagani qayd etilgan.

Talabning o‘sish prognozlari esa davlatlarning iqlim siyosatidan qat’i nazar, asosiy ssenariyga asoslangan.