Eron namoyishlarida 490 kishi halok bo‘ldi
Eronning bir qancha hududlarida narxlarning oshishi ortidan boshlangan namoyishlar davom etmoqda. Bu haqda Zamin.uz xabar berdi.
Reuters agentligining xabar berishicha, ikki haftadan beri davom etayotgan bu tartibsizliklar oqibatida kamida 490 nafar namoyishchi va xavfsizlik kuchlarining 48 vakili halok bo‘lgan. Shuningdek, 10 mingdan ortiq kishi hibsga olingani ma’lum qilinmoqda.
Bu haqda Kursiv.uz nashri xabar berdi. Hozircha Eron hukumati namoyishlar chog‘ida halok bo‘lganlar soni bo‘yicha rasmiy ma’lumot bermagan.
AQSH prezidenti Donald Tramp esa namoyishchilarga nisbatan kuch ishlatish davom etsa, AQSH aralashishi mumkinligini ta’kidladi. Manbalarning xabar berishicha, Vashington turli chora-tadbirlarni ko‘rib chiqmoqda.
Ular orasida kiberhujumlar, iqtisodiy sanksiyalarni kuchaytirish va aniq harbiy zarbalar kiritish ehtimoli bor. Tramp, shuningdek, Eron hududida internetni qayta tiklash maqsadida Starlink sun’iy yo‘ldosh tarmog‘ini ishga tushirish masalasini Ilon Mask bilan muhokama qilayotganini ma’lum qilgan.
Bu orada Eron parlamenti spikeri Mohammad Boqer Qolibof AQSH va uning ittifoqchilariga qarshi ehtimoliy javob zarbalari haqida gapirdi. U nishon sifatida AQSH harbiy bazalari, kemalari va Isroil hududini tilga oldi.
Eron rasmiylari esa namoyishlar va tartibsizliklar ortida AQSH va Isroil turganini iddao qilmoqda. Shu bilan birga, Eron hukumati aholiga G‘arbning “fitnalari”ga qarshi mitinglarda ishtirok etishga chaqirgan.
