Shveysariya 2038 yilgi Olimpiadaga mezbonlik qilishi mumkin
Yangi yil arafasida Shveysariyaning Krans-Montana tog‘-chang‘i kurortida yuz bergan dahshatli yong‘in oqibatida 40 kishi halok bo‘ldi. Bu haqda Zamin.uz xabar berdi.
Ushbu voqea ortidan mazkur kurort yana kun tartibiga chiqdi, bu safar sport yangiliklari bilan. Mahalliy axborot vositalarining xabar berishicha, Krans-Montana 2038 yilgi Qishki Olimpiya o‘yinlarining potentsial mezbon joylaridan biri sifatida ko‘rib chiqilmoqda.
"Switzerland 2038" tashabbusi doirasida Olimpiya o‘yinlarini qabul qilishi mumkin bo‘lgan joylar ro‘yxati e’lon qilindi. Ro‘yxatda fransuz tilida so‘zlashuvchi hududlardan Lozanna, Jeneva va Krans-Montana kiritilgan.
Shuningdek, Engelberg, Syurix, Zug, Lugano, Lenzerhayde va Sankt-Moris kabi boshqa joylar ham nomzod sifatida ko‘rsatildi. Loyiha o‘ziga xos tarzda "bitta shahar" modeli emas, balki butun mamlakat bo‘ylab tarqoq formatga asoslanadi.
Musobaqalarni mavjud infratuzilmalar asosida o‘tkazish va yangi qurilishlarni imkon qadar kamaytirish g‘oyasi ilgari surilmoqda. "Switzerland 2038" assotsiatsiyasi mazkur tashabbusning boshida turibdi.
Swissinfo xabariga ko‘ra, ochilish marosimi uchun Lozanna, yopilish marosimi uchun esa Bern shaharlarining nomzodligi ko‘rib chiqilmoqda. Ushbu tashabbus Shveysariyaning barqaror rivojlanish tamoyillariga mos ravishda ishlab chiqilgan.
