81 yoshli buvi Minecraft orqali nabirasiga yordam bermoqda
Kaliforniyada yashovchi 81 yoshli Syu Jeko zamonaviy texnologiyalarni o‘ziga xos tarzda ishga solib, oilasini qo‘llab-quvvatlashga muvaffaq bo‘ldi. Bu haqda Zamin.uz xabar berdi.
U nabirasidan mashhur Minecraft o‘yinini o‘rganib, YouTube platformasida GrammaCrackers nomli kanal ochdi. Ushbu kanal qisqa vaqt ichida internet foydalanuvchilari orasida mashhurlikka erishdi.
Bir oy ichida uning obunachilari soni 100 mingdan oshdi. Syuning geymerlik yoki videoblogerlik borasida oldin hech qanday tajribasi bo‘lmagan.
Texnologiyalardan faqat kundalik ehtiyojlar uchun foydalanib kelgan. Biroq nabirasi Jek og‘ir xastalik bilan kurashayotgani sabab, Syu yangi imkoniyatlarni sinab ko‘rishga qaror qiladi.
Dastlab o‘yin o‘ynash va strimlar olib borish unga qiyin tuyulgan. Ammo u o‘z sa’y-harakatlari bilan vlogerlik orqali daromad topishga erishdi.
Kanaldan tushayotgan mablag‘lar, ya’ni monetizatsiya, reklama va tomoshabinlarning xayriyasi, 17 yoshli Jekning davolanishi uchun sarflanmoqda. Jek saraton kasalligiga qarshi kuchli davolash kursini o‘tkazgan.
Hozirda esa uzoq muddatli reabilitatsiya jarayonida. Syuning Minecraft o‘yiniga qiziqishi aynan Jekning yordamida boshlangan.
O‘tgan yil yozida Jek buvisiga o‘yin asoslarini o‘rgatgan edi. Bundan tashqari, oila GoFundMe platformasida ham xayriya aksiyasini yo‘lga qo‘ygan.
Syuning strimlarini tomosha qilayotgan ko‘plab odamlar ushbu tashabbusni faol qo‘llab-quvvatlamoqda. Bu voqea nafaqat oilaviy birdamlik, balki insoniy mehr va yangi imkoniyatlarni izlashning yorqin namunasi bo‘ldi.
