Rossiya armiyasining yo‘qotishlari 163 mingdan oshdi
Rossiya va Ukraina o‘rtasidagi keng ko‘lamli qurolli mojaro boshlanganidan buyon Rossiya armiyasining yo‘qotishlari haqida yangi ma’lumotlar e’lon qilindi. Bu haqda Zamin.uz xabar berdi.
BBC rus xizmati va «Mediazona» nashri volontyorlar bilan hamkorlikda olib borgan surishtiruv natijalariga ko‘ra, 2026-yilning 13-yanvar holatiga kamida 163 606 nafar rossiyalik harbiyning o‘limi ochiq manbalar orqali tasdiqlangan. Ma’lumotlarga ko‘ra, halok bo‘lganlar orasida 6 302 nafari yuqori martabali ofitserlar hisoblanadi.
Shuningdek, 2024-yil kuzidan boshlab urushda eng ko‘p yo‘qotish ko‘ngilli askarlar (53 976 nafar) orasida kuzatilmoqda. Qamoqxonalardan yollangan mahkumlar va safarbarlikka jalb etilgan askarlar o‘rtasida ham o‘lim holatlari yuqoriligicha qolmoqda.
Yosh toifasida esa 33–38 yoshdagi erkaklar orasida yo‘qotishlar eng yuqori darajada. Bu yoshdagi askarlarning aksariyati urushga o‘z xohishiga ko‘ra borgan.
Ukraina Qurolli kuchlari Bosh shtabining ma’lumotlariga ko‘ra, Rossiyaning umumiy yo‘qotishlari, ya’ni halok bo‘lgan va yaralangan harbiylar soni 1,1 milliondan oshgan. 2026-yil 17-yanvar holatiga kelib, Rossiyaning Ukrainaga bosqini 1424-kuniga yetib, urush davomiyligi bo‘yicha rekord o‘rnatdi.
Bundan tashqari, Rossiya kuchlari Ukraina energetika tizimiga yirik zarbalar berishda davom etmoqda. Ukraina Xavfsizlik xizmati bu hujumlarni «insoniyatga qarshi jinoyat» deb baholadi.
Isitish mavsumi boshidan buyon Ukraina energetika obyektlariga 256 ta havo hujumi uyushtirilgan. Rossiya kuchlari 11 ta gidroelektr stansiyasi va 45 ta yirik issiqlik elektr stansiyasini nishonga olgan.
«The New York Times» gazetasi Kiyevdagi joriy qishni urush boshlanganidan beri «eng og‘ir mavsum» deb atadi. Mutaxassislarning fikricha, faqat ismi-sharifi aniq bo‘lgan va o‘limi rasman tasdiqlangan shaxslar ro‘yxatga kiritilgan.
Real yo‘qotishlar soni bundan ancha yuqori bo‘lishi ehtimoldan xoli emas. Ukrainadagi energetik inqiroz urushning yakuniy natijasiga qanday ta’sir ko‘rsatishi mumkinligi esa hali noma’lum.
