AQSh qo‘shinlari Ain al-Asad bazasidan chiqdi
Iroq mudofaa vazirligi ma’lumotiga ko‘ra, AQSh qo‘shinlari mamlakat g‘arbidagi Ain al-Asad aviabazasidan to‘liq chiqib ketdi. Bu haqda Zamin.uz xabar berdi.
Endilikda ushbu baza butunlay Iroq armiyasi nazoratiga o‘tkazildi. Mazkur aviabaza uzoq yillar davomida AQSh va koalitsiya kuchlari tomonidan foydalanib kelingan edi.
2024 yilda Vashington va Bag‘dod o‘rtasida AQSh boshchiligidagi koalitsiya kuchlarini Iroqdan olib chiqish va ikki tomonlama xavfsizlik hamkorligini yo‘lga qo‘yish bo‘yicha kelishuv imzolangan edi. Ushbu baza mintaqadagi ziddiyatli vaziyatlarda, ayniqsa, 2020 yilda Eron generali Qosim Sulaymoni o‘ldirilganidan so‘ng, Eronni qo‘llab-quvvatlovchi qurolli guruhlar tomonidan hujumga uchragan.
Iroq armiyasi vakilining so‘zlariga ko‘ra, AQSh qo‘shinlari bazani tark etgan, ammo ba’zi logistika masalalari sababli bir necha harbiy xodim bazada qolgan. Ushbu jarayonning tafsilotlari xavfsizlik nuqtai nazaridan oshkor qilinmagan.
Dastlabki rejalarga ko‘ra, AQSh qo‘shinlarining bir qismi 2025 yil sentyabriga qadar, qolganlari esa 2026 yil oxirigacha Iroqdan chiqib ketishi belgilangan edi. Hozircha chiqishning qachon boshlanganiga oid aniq ma’lumot rasmiy ravishda e’lon qilinmagan.
