Tramp “Tinchlik kengashi” tashabbusini e’lon qildi
AQSh sobiq prezidenti Donald Tramp global mojarolarni hal qilish maqsadida “Tinchlik kengashi” deb nomlangan yangi tashabbusni e’lon qildi. Bu haqda Zamin.uz xabar berdi.
Ushbu tashabbus doirasida 60 ga yaqin davlatni kengashga qo‘shilishga taklif etish rejalashtirilgan. Ammo ko‘plab davlatlar bu tashabbusga ehtiyotkorlik bilan yondashmoqda va hozircha ochiq qo‘llab-quvvatlashga shoshilmayapti.
Tashabbus rejalariga ko‘ra, kengash dastlab Yaqin Sharqdagi G‘azo mojarosini hal qilish bilan shug‘ullanadi, keyinchalik esa boshqa mintaqaviy nizolarni ham qamrab oladi. Kengashga Donald Tramp umrbod raislik qilishi belgilangan.
Shuningdek, uch yillik a’zolikdan tashqari, katta miqdorda mablag‘ to‘lagan davlatlarga doimiy a’zolik maqomi berilishi ko‘zda tutilgan. Hozircha faqat Vengriya bu tashabbusni ochiq qo‘llab-quvvatlagan.
Boshqa davlatlar esa tashabbus Birlashgan Millatlar Tashkilotining (BMT) xalqaro nizolarni hal qilishdagi rolini zaiflashtirishi mumkinligidan xavotir bildirmoqda. Ayrim diplomatlar yangi kengash BMT faoliyatiga salbiy ta’sir ko‘rsatishi va xalqaro muloqot tizimida kelishmovchiliklarni kuchaytirishi mumkinligini ta’kidlashmoqda.
BMT rahbariyati esa davlatlar o‘zaro hamkorlik shakllarini erkin tanlash huquqiga ega ekanini eslatib, tashkilot o‘z vazifalarini bajarishda davom etishini ma’lum qildi. Mutaxassislar global tinchlik va xavfsizlikni ta’minlashda BMT muhim va yagona umumiy platforma bo‘lib qolayotganini qayd etmoqda.
