De Beers olmos narxlarini bir yil ichida pasaytirdi
De Beers kompaniyasi bir yil ichida ilk bor olmoslarning rasmiy narxlarini pasaytirdi. Bu haqda Zamin.uz xabar berdi.
Bloomberg agentligi ma’lumotiga ko‘ra, kompaniya oxirgi marta bunday qarorni 2024 yilning dekabr oyida qabul qilgan edi. Avvalroq De Beers bozorni ushlab qolish maqsadida ayrim turdagi olmoslarni yopiq savdolarda chegirma bilan taklif qilgan.
Biroq o‘sha vaqtda rasmiy narxlar ba’zi toifalarda bozor bahosidan qariyb 25 foiz yuqori darajada saqlanib qolgan edi. Narxlarni qayta ko‘rib chiqishga bir nechta omil sabab bo‘ldi.
Xususan, Xitoyda qimmatbaho taqinchoqlarga talabning pasayishi, sun’iy olmoslarning ommalashuvi va Hindistondan AQShga eksport qilinadigan olmoslarga yuqori bojxona to‘lovlari joriy etilishi narxlar pasayishiga turtki bo‘ldi. Yil boshidagi savdolarda De Beers, ayniqsa, hajmi uchdan to‘rt karatdan kattaroq bo‘lgan qayta ishlanmagan olmoslarning narxini sezilarli darajada tushirdi.
Bloomberg xabariga ko‘ra, kompaniya odatda bozorni beqarorlashtirmaslik uchun narxlarni pasaytirishdan o‘zini tiyadi, ammo bu safar istisno holat yuz berdi. Narxlarning pasayish hajmi hozircha aniq oshkor etilmadi, bunga taklif tarkibi va narx belgilash tartibidagi o‘zgarishlar ta’sir qilgani aytilmoqda.
