Domodedovo aeroporti kimoshdi savdosi bekor qilindi
Domodedovo aeroportini sotish bo‘yicha o‘tkazilishi rejalashtirilgan kimoshdi savdosi xaridorlar yo‘qligi sababli amalga oshmadi. Bu haqda Zamin.uz xabar berdi.
Bu haqda RBK xabar berdi. Manbalarning ma’lumotiga ko‘ra, savdoda qatnashish uchun faqat birgina ariza kelib tushgan.
Ushbu ariza yakka tartibdagi tadbirkor Yevgeniy Bogatiy tomonidan yuborilgan bo‘lsa-da, u zaruriy hujjatlarni to‘liq taqdim etmagani sababli komissiya tomonidan savdoga qo‘yilmadi. Ma’lumki, 2025-yilning iyun oyida Moskva viloyati Arbitraj sudi qaroriga binoan, Domodedovo aeroporti davlat mulkiga o‘tkazilgan edi.
Sud aeroportning benefitsiarlari xorijiy davlatlar – Turkiya, Birlashgan Arab Amirliklari va Isroil fuqarolari ekanligini aniqlagan. Ular mamlakat uchun strategik ahamiyatga ega bo‘lgan aktivlarni boshqarib, foydani chet elga olib chiqib ketganlikda ayblangan.
Bu esa Rossiya qonunchiligini buzilishiga olib kelgan. O‘tgan yil oxirida Rossiya moliya vaziri Anton Siluanov Domodedovoni xususiylashtirish bo‘yicha auksion 2026-yil boshida o‘tkazilishini va potensial investorlar qiziqish bildirganini ma’lum qilgan edi.
Yanvar oyida aeroport 132 milliard rubl narx bilan savdoga qo‘yilgan edi, biroq hozircha xaridorlar topilmadi.
