Rossiya hujumlari Kiyevni elektrsiz qoldirdi

Rossiya tomonidan amalga oshirilgan hujumlar natijasida Kiyev shahrining katta qismi elektrsiz qoldi. Bu haqda Zamin.uz xabar berdi.

Reuters agentligi xabariga ko‘ra, shahar hududining 60 foizdan ortig‘ida elektr ta’minoti uzilgan. Ukraina Prezidenti Volodimir Zelenskiy ushbu holat haqida ijtimoiy tarmoqlarda ma’lumot berdi.

Prezidentning ta’kidlashicha, Kiyevda ertalab 4 mingga yaqin bino isitilmayapti. Havo harorati sovuq bo‘lib, minglab aholi bir necha soatdan beri elektrsiz yashamoqda.

Shuningdek, Sharqdagi Xarkiv viloyatida ham elektr ta’minoti jiddiy zarar ko‘rgan. Viloyat rahbari Oleg Sinihubovning so‘zlariga ko‘ra, chorshanba kuni 520 ming iste’molchi elektrsiz qolgan.

Bu raqam avvalgi kunlarga nisbatan kamaygan bo‘lsa-da, hudud yana hujumga uchragan. Janubiy Odesa viloyatida esa DTEK kompaniyasining bir inshooti zarar ko‘rgan, natijada minglab xonadon elektr ta’minotisiz qolgan.

Ayrim hududlarda elektr tiklangan bo‘lsa-da, kun davomida uzilishlar davom etmoqda. Bu holat mobil aloqa xizmatlariga ham ta’sir qildi.

Kyivstar mobil tarmog‘ining taxminan 10 foizi ishlamay qolgan. Mazkur vaziyat Ukraina aholisining kundalik hayotiga jiddiy ta’sir ko‘rsatmoqda.

Hozirgi kunda mamlakatda elektr ta’minotini tiklash bo‘yicha ishlar olib borilmoqda.