Ronaldu haykali yonida noma’lum shaxs yong‘in chiqardi
Portugaliyaning Madeyra orolida Krishtianu Ronaldu haykali atrofida jamoatchilikning e’tiborini tortgan noxush hodisa yuz berdi. Bu haqda Zamin.uz xabar berdi.
SR7 muzeyi oldida noma’lum shaxs futbolchining haykaliga o‘t qo‘yishga uringan. Ushbu voqea videoga olinib, keyinchalik ijtimoiy tarmoqlarda tarqatilgani ma’lum qilingan.
Bu haqda UOL nashri xabar berdi. Ma’lumotlarga ko‘ra, hodisani sodir etgan shaxs ushbu videoni o‘zining Instagram sahifasiga joylashtirgan va izoh qismida “Bu Xudoning oxirgi ogohlantirishi” deb yozgan.
Shuningdek, Krishtianu Ronalduning rasmiy akkaunti ham belgilangan. Ushbu harakat va bayonot ko‘plab savollarni keltirib chiqardi.
Videoyozuvda erkak haykalga yonuvchan suyuqlik sepib, uni yoqib yuborayotgani aks etgan. Keyin u musiqa qo‘yib, raqsga tushgan.
Ammo yong‘in uzoq davom etmagan, alanga tezda o‘chib, haykalga katta zarar yetmagan. Mazkur haykal Madeyra orolining Funshal shahrida o‘rnatilgan bo‘lib, bu joy turistlar orasida mashhur sanaladi.
Haykal SR7 muzeyi oldida joylashgan bo‘lib, muzeyda Ronaldu faoliyatiga oid yutuqlar, portretlar va shaxsiy buyumlar namoyish etiladi. “Korreyu da Manya” nashrining yozishicha, Madeyra oroli Jamoat xavfsizligi politsiyasi voqeani sodir etgan shaxsni aniqlagan.
Ma’lum bo‘lishicha, ushbu shaxs avval ham shunga o‘xshash harakatlari bilan tanilgan.
