Samsunda YTH: Sobiq badmintonchi hayotdan ko‘z yumdi
Turkiyaning Samsun shahrida yuz bergan yo‘l-transport hodisasi natijasida badminton bo‘yicha Turkiya terma jamoasining sobiq a’zosi Umut Jan Turan hayotdan ko‘z yumdi. Bu haqda Zamin.uz xabar berdi.
Hodisa sababli Ozarbayjon fuqarosi huquq-tartibot idoralari tomonidan qo‘lga olingan. Demirören axborot agentligi ma’lumotlariga ko‘ra, voqea mototsiklning to‘xtab turgan yuk mashinasiga urilishi oqibatida sodir bo‘lgan.
Mototsiklni boshqarayotgan Umut Jan Turan og‘ir tan jarohatlari bilan shifoxonaga yetkazilgan, ammo shifokorlar uning hayotini saqlab qolishga muvaffaq bo‘la olishmagan. Marhum avval Turkiya milliy badminton terma jamoasi tarkibida faoliyat yuritgan.
So‘nggi yillarda esa u kuryer sifatida ishlagan. Hodisa yuzasidan surishtiruv ishlari davom etmoqda.
Voqeada qatnashgan yuk mashinasining haydovchisi, Ozarbayjon fuqarosi Nodir S., tergov organlari tomonidan qo‘lga olingan va hodisaning batafsil sabablari aniqlanmoqda.
