Eron namoyishlarida 3117 kishi halok bo‘ldi
Eron tashqi ishlar vaziri Abbos Aragchi mamlakatda davom etayotgan ommaviy norozilik namoyishlari haqida ma’lumot berdi. Bu haqda Zamin.uz xabar berdi.
Uning so‘zlariga ko‘ra, namoyishlar paytida halok bo‘lganlar soni 3117 kishiga yetgan. Qurbonlarning asosiy qismi, ya’ni 2427 nafari tinch aholi va xavfsizlik xodimlari bo‘lsa, 690 nafari «terrorchilar» sifatida qayd etilgan.
Namoyishlar davomida katta miqdordagi zarar yetkazilgani aytilmoqda. Xususan, 305 ta tez yordam mashinasi va avtobus, 24 ta yoqilg‘i quyish shoxobchasi, 700 ta savdo do‘koni, 300 ta xususiy uy, 750 ta bank, 414 ta davlat muassasasi, 749 ta politsiya bo‘limi va 120 ta Basij markazi zarar ko‘rgan.
Shuningdek, 200 ta maktab, 350 ta masjid, 15 ta kutubxona, 2 ta arman cherkovi, 253 ta avtobus bekati, 600 ta bankomat va 800 ta shaxsiy avtomobil ham vayron qilingan. Norozilik namoyishlari mamlakatdagi iqtisodiy ahvolga nisbatan norozilik sababli dekabr oyining oxirida boshlangan.
Rasmiylar bu tartibsizliklarni tashkil etishda Qo‘shma Shtatlar va Isroilni ayblamoqda. Shu bilan birga, AQSH prezidenti Donald Tramp namoyishlarning keskin bostirilishi holatida Eronni jiddiy javob choralari kutayotganini ta’kidlagan.
