250 km masofani bosib o‘tgan mushuk uyiga qaytdi

Ispaniyadan Fransiyagacha 250 kilometr masofani bosib o‘tib uyiga qaytgan mushuk haqida hikoya ko‘pchilikni hayratga soldi. Bu haqda Zamin.uz xabar berdi.

Bu voqea Fil-u laqabli mushukning o‘z uyiga bo‘lgan ishonch va iroda kuchini namoyon etdi. France Info xabariga ko‘ra, mushukning egalari Evelin va Patrik Sir o‘tgan yozda farzandlari bilan Ispaniyaga dam olishga borgan.

Avgust oyida ular ta’tilni yakunlab, yashaydigan joyi — Fransiyaning Olonzak kommunasiga qaytishga qaror qilishgan. Yo‘lda benzin quyish shoxobchasida to‘xtashganida, mushuk mashinadan tushib qolganini sezmay qolishgan.

Oila mushukning yo‘qligini ancha uzoqlashgach payqagan va darhol qaytib uni qidirishga kirishgan. Ammo benzin quyish shoxobchasida ham, uning atrofida ham mushukdan darak topa olishmagan.

Shundan so‘ng ular mushukni yo‘qotganliklarini tushunib, og‘ir kayfiyatda uylariga qaytgan. Oradan besh oy o‘tib, kutilmaganda Olonzak kommunasida yashovchi Elen ismli bir ayol oilaga qo‘ng‘iroq qiladi.

U 9 dekabr kuni mushukni o‘z hovlisida ko‘rib qolganini va unga yordam berganini aytadi. Ayol mushukni parvarish qilib, oziqlantirib kelgan.

Mushuk yo‘talayotgani sababli uni veterinarga olib borganda, mutaxassislar unda maxsus chip borligini aniqlashgan. Chipdagi ma’lumotlar orqali Elen mushukning egalarini topib, ular bilan bog‘langan.

Shu tariqa, Fil-u besh oylik sarguzashtdan so‘ng o‘z uyiga qaytadi. Mushukning 250 kilometr masofani qanday bosib o‘tgani esa hanuz sirligicha qolmoqda.

U yo‘lni o‘zi topganmi, transportdan foydalanganmi yoki biror kishining yordami bilan yetib kelganmi — bu savollar javobsiz. Ammo bir narsa aniq: Fil-u o‘z uyiga bo‘lgan sadoqatini va irodasini yana bir bor isbotladi.