AQShda kuchli bo‘ron: 428 ming kishi elektrsiz qoldi
AQShda kuchli qor bo‘roni oqibatida 428 mingdan ortiq kishi elektr ta’minotisiz qoldi. Bu haqda Zamin.uz xabar berdi.
PowerOutage.us xabariga ko‘ra, yog‘ingarchilik va kuchli shamol bir qator hududlarda elektr tarmoqlariga zarar yetkazgan. Bu holat elektr ta’minoti uzilishlariga sabab bo‘lgan.
Fox News ma’lumotiga ko‘ra, ob-havoning keskin yomonlashishi aviatsiya sohasiga ham jiddiy zarar yetkazdi. So‘nggi to‘rt kun ichida Amerika aviakompaniyalari tomonidan 16 mingdan ortiq reys bekor qilingan.
The Washington Post xabarida aytilishicha, kamida 22 shtatda qishki bo‘ron tufayli favqulodda holat e’lon qilingan. Milliy ob-havo xizmati ma’lumotlariga ko‘ra, 24-yanvar kuni Kanzas-Siti shahrida so‘nggi 70 yilda kuzatilgan eng kuchli qor yog‘ishi qayd etilgan.
Yog‘in miqdori taxminan 13 sm bo‘lib, avvalgi rekord 5,5 sm atrofida edi. Sinoptiklar qor va muzlash davom etishini, bu esa elektr hamda transport tizimlarida qo‘shimcha muammolar keltirib chiqarishi mumkinligini ma’lum qilgan.
