Yaponiya pandalarsiz qolmoqda: Syao-Syao va Ley-Ley Xitoyga qaytmoqda
Tokio shahridagi Ueno hayvonot bog‘ida so‘nggi kunlarda odamlar gavjum. Bu haqda Zamin.uz xabar berdi.
Minglab tashrifchilar Yaponiyada qolgan so‘nggi pandalar — Syao-Syao va Ley-Ley bilan xayrlashish uchun bog‘ga kelishmoqda. Ma’lum qilinishicha, ushbu egizak pandalar 27-yanvar kuni o‘z vatani — Xitoyga qaytariladi.
Hayvonlarni yaqindan ko‘rish imkoniyati cheklangani bois, hayvonot bog‘ida maxsus lotereya tizimi joriy etilgan. Biroq, oxirgi kunlarda kuniga 4,8 ming nafargacha tashrifchi pandalarni ko‘rishga muvaffaq bo‘lgan.
Ayrim mehmonlar esa pandalarni bevosita ko‘ra olmagan bo‘lsa-da, xayrlashuv muhitini his qilish uchun kelganlarini ta’kidlashmoqda. Syao-Syao va Ley-Ley 2021 yilda dunyoga kelgan bo‘lib, ular Ueno bog‘ida tug‘ilgan birinchi panda egizaklari sifatida tarixga kirgan.
Ularning Xitoyga qaytarilishi bilan Yaponiya 1972-yildan beri ilk bor o‘z hayvonot bog‘larida umuman pandalarsiz qoladi. Bu voqea mamlakatda katta e’tibor va qiziqish uyg‘otmoqda.
