Eronda xalqaro internet cheklovlari bekor qilinmoqda
Eronda xalqaro internetga kirish bo‘yicha cheklovlar bosqichma-bosqich bekor qilinmoqda. Bu haqda Zamin.uz xabar berdi.
Diplomatik manbalarning ma’lumotiga ko‘ra, yanvar oyidan boshlab Eron hukumati xalqaro internetdan foydalanish bo‘yicha avval joriy etilgan cheklovlarni yumshatish jarayonini boshlagan. Bu ish bir vaqtning o‘zida emas, balki bosqichma-bosqich amalga oshirilayotgani ta’kidlanmoqda.
Manbalarga ko‘ra, cheklovlar nafaqat milliy internet platformasi bilan chegaralanib qolmay, balki xalqaro tarmoqlardan foydalanishga ham ta’sir qilgan. Xabarda 19 yanvardan boshlab xalqaro internetga kirishdagi to‘siqlar izchil ravishda olib tashlanayotgani haqida ma’lumot berilgan.
Shu bilan birga, Eron prezidenti Masud Pezeshkian tegishli idoralarga internet xizmatlarini rivojlantirish va xalqaro tarmoqqa kirishni ta’minlash maqsadida cheklovlarni bekor qilish bo‘yicha ko‘rsatma berganini ham qayd etishgan. Bundan oldin, mamlakatda milliy valyutaning keskin qadrsizlanishi sababli 28 dekabr kuni ommaviy norozilik namoyishlari boshlangan edi.
Ushbu namoyishlar 46 ta shaharga tarqalgan. 8 yanvar kuni esa mamlakatda internet va mobil aloqa to‘liq o‘chirilgani, bu esa axborot oqimini qattiq cheklab qo‘ygani haqida xabar berilgan edi.
