Habi Leym intellektual mulkini 975 mln dollarga sotdi
TikTok platformasida o‘zining so‘zsiz va oddiy videolari orqali tanilgan senegallik bloger Habi Leym atrofida e’tiborni tortuvchi yangilik tarqaldi. Bu haqda Zamin.uz xabar berdi.
“Tell News Magazine” xabariga ko‘ra, Habi Leym o‘z intellektual mulk huquqlarini 975 million dollarlik shartnoma orqali sotgan. Ushbu kelishuvni AQShning Rich Sparkle Holdings kompaniyasi amalga oshirgan bo‘lib, ular uch yil davomida Leymning intellektual mulkidan eksklyuziv foydalanish huquqini qo‘lga kiritgan.
Shartnomaga ko‘ra, kompaniya Leymning sun’iy intellekt asosida yaratilgan raqamli nusxasini ishlab chiqish imkoniyatiga ham ega bo‘ladi. Qayd etilishicha, bloger bu mablag‘ni oddiy gonorar sifatida olmagan, aksincha, kompaniyaning nazorat paketiga ega aksiyador sifatida faoliyatini kengaytirgan.
Bu orqali u oddiy kontent yaratuvchidan korporativ soha vakiliga aylanishga intilmoqda. Mutaxassislar bu modelni "inflyuenser daromadining yangi formulasi" deb atashmoqda.
Ularning fikricha, bir martalik reklama daromadlaridan ko‘ra, kompaniya ulushiga ega bo‘lish uzoq muddatda katta foyda keltirishi mumkin. Habi Leymning muvaffaqiyat yo‘li ko‘pchilik uchun o‘ziga xosdir.
Pandemiya davrida Italiyada oddiy ishchi bo‘lgan Leym bugungi kunda TikTok’da 160 milliondan ortiq obunachiga ega bo‘lgan eng mashhur kontent yaratuvchilardan biriga aylandi. Uning minimalistik va so‘zsiz kontenti yirik brendlar bilan hamkorlik qilish imkonini bergan.
Nashrning ta’kidlashicha, Rich Sparkle Holdings kompaniyasi ushbu bitim orqali ijtimoiy tarmoqlar, litsenziyalash va sun’iy intellekt asosidagi kontent sohasida yiliga 4 milliard dollardan ortiq daromad olishni rejalashtirmoqda. Shuningdek, bitim e’lon qilinganidan so‘ng kompaniyaning aksiyalari bir kun ichida 250 foizdan ko‘proq oshgan.
Shu tariqa, bu muvaffaqiyat inflyuenserlar dunyosida yangi qoidalar shakllanayotganini ko‘rsatadi: reklama daromadlari o‘rniga aksiyadorlik ulushiga ega bo‘lish bugungi kundagi asosiy tamoyilga aylanmoqda.
