Tramp Janubiy Koreyani kelishuvni buzishda aybladi
Donald Tramp o‘zining Truth Social’dagi sahifasida Janubiy Koreyani o‘tgan yili erishilgan savdo kelishuviga rioya qilmayotganlikda aybladi. Bu haqda Zamin.uz xabar berdi.
U keng turdagi mahsulotlarga, jumladan avtomobillar, yog‘och materiallari va farmatsevtika mahsulotlariga nisbatan amaldagi 15 foizlik boj stavkalarini 25 foizga oshirish niyatida ekanini ma’lum qildi. Trampning so‘zlariga ko‘ra, Janubiy Koreya kelishuvni tasdiqlash jarayonida sust harakat qilmoqda.
Shu bilan birga, AQSh o‘z zimmasiga olgan majburiyatlarni bajarishda tezroq qadam tashlagan. Boj stavkalarini oshirish qarori esa aynan kelishuv majburiyatlarining bajarilmasligi bilan izohlangan.
Janubiy Koreya rasmiylari esa ushbu qaror yuzasidan hali rasmiy bildirishnoma olmaganliklarini aytib, masalani AQSh bilan tezkorlik bilan muhokama qilishga tayyor ekanliklarini bildirishgan. Eslatib o‘tamiz, tomonlar o‘tgan yilning oktyabr oyida savdo kelishuviga erishgan bo‘lib, unga ko‘ra Janubiy Koreya AQSh iqtisodiyotiga 350 milliard dollar sarmoya kiritishi rejalashtirilgan edi.
Ushbu mablag‘ning bir qismi kemasozlik sohasiga yo‘naltirilishi ko‘zda tutilgan. Mazkur kelishuv hozirda Janubiy Koreya Milliy assambleyasida ko‘rib chiqilmoqda va mahalliy ommaviy axborot vositalariga ko‘ra, u fevral oyida tasdiqlanishi mumkin.
