“Bishkeklik manyak” hibsxonada o‘lik holda topildi
Qirg‘izistonning Bishkek shahridagi 1-son tergov hibsxonasida 41 yoshli Qumarbek Abdirovning jasadi topildi. Bu haqda Zamin.uz xabar berdi.
U “bishkeklik manyak” nomi bilan tanilgan edi. Bu haqda mahalliy axborot manbalari xabar bergan.
Rasmiy ma’lumotlarga ko‘ra, Abdirovning jasadi 7 fevral kuni soat 12:30 da kameradan topilgan. Dastlabki tekshiruvlar u o‘z joniga qasd qilgan bo‘lishi mumkinligini ko‘rsatmoqda.
Ushbu holat yuzasidan tergovga qadar tekshiruv ishlari boshlangan. Abdirov 2025 yil sentyabr oyida 17 yoshli Oysuluv Mukashevani zo‘rlab o‘ldirganlikda ayblanib qo‘lga olingan edi.
Tergov davomida u bir necha ayolni zo‘rlab o‘ldirganini tan olgan. Jinoyatlari ko‘pincha shahar chekkasida va tog‘li hududlarda sodir etilgan.
Ma’lumotlarga ko‘ra, Qumarbek Abdirov 2016 yilda qotillikka urinish jinoyati uchun 12 yilga hukm qilingan, biroq keyinchalik jazosi 7 yilga qisqartirilgan va u 2018 yilda muddatidan oldin ozod qilingan. Oysuluv Mukashevaning o‘ldirilishi Qirg‘izistonda katta shov-shuvga sabab bo‘lgan.
Bu voqeadan so‘ng, Qirg‘iziston prezidenti Sadir Japarov og‘ir jinoyatlar uchun o‘lim jazosini qayta tiklash taklifini ilgari surgan. Ammo Konstitutsiyaviy sud 2025 yil dekabr oyida bu chora Konstitutsiyaga va xalqaro majburiyatlarga zid ekanini bildirgan.
Shuningdek, Abdirovning muddatidan oldin ozod qilinishida ishtirok etgan Bishkek shahar sudining uch sobiq sudyasi va bir prokuror ham hibsga olingan. Ushbu holat bo‘yicha tergov ishlari davom etmoqda.
