Merilenddagi maktabda otishma: bir o‘quvchi jarohatlandi
9-fevral kuni AQShning Merilend shtati, Rokvill shahrida joylashgan Tomas Vutton nomidagi o‘rta maktabda otishma yuz berdi. Bu haqda Zamin.uz xabar berdi.
Hodisa oqibatida bir nafar o‘quvchi jarohat olib, shifoxonaga yetkazildi. Bu haqda Rokvill shahar politsiyasi ma’lum qildi.
Rasmiy ma’lumotlarga ko‘ra, otishma mahalliy vaqt bilan taxminan soat 14:15 da sodir bo‘lgan. Xabar kelib tushgach, Montgomeri okrugi politsiyasi va Rokvill shahar politsiyasi voqea joyiga zudlik bilan yetib borgan.
Hodisa joyida bir nafar o‘quvchi o‘q tegishi oqibatida yaralangan va darhol tibbiyot muassasasiga olib ketilgan. Shifokorlarning ta’kidlashicha, jabrlangan o‘quvchining ahvoli barqaror.
Huquq-tartibot organlari bergan ma’lumotga ko‘ra, gumonlanuvchi ham ushbu maktabda o‘quvchi bo‘lib, u hodisadan ko‘p o‘tmay maktab yaqinida qo‘lga olingan. Politsiya hodisa yuzasidan surishtiruv olib bormoqda va jamoat xavfsizligiga hech qanday qo‘shimcha tahdid yo‘qligini ma’lum qilgan.
Voqea sababli maktab o‘quvchilari barcha protseduralar yakunlanguniga qadar binoda qolishgan.
