Fransiyada 89 qizga zo‘ravonlikda gumon qilingan shaxs tergov qilinmoqda
Fransiyada sakkizta mamlakat hududida 89 nafar voyaga yetmagan qizga nisbatan jinsiy zo‘ravonlik sodir etganlikda gumonlangan shaxsga qarshi jinoiy ish qo‘zg‘atildi. Bu haqda Zamin.uz xabar berdi.
Bu haqda “Le Figaro” nashri xabar berdi. Ma’lum bo‘lishicha, ushbu shaxs 1967 yildan 2022 yilgacha bo‘lgan davrda jinsiy jinoyatlar sodir etgan.
Gumonlanuvchi Fransiya, Jazoir, Shveysariya, Germaniya, Niger va boshqa davlatlarda yashagan va vaqtinchalik o‘qituvchi yoki yoshlar oromgohlari rahbari sifatida ishlagan. Prokuratura ma’lumotlariga ko‘ra, tergov ishlari 2024 yilning yanvar oyida Fransiyaning Grenobl shahrida boshlangan.
Tergov davomida 13 yoshdan 17 yoshgacha bo‘lgan jabrlanuvchilar ro‘yxati tuzilgan. Hozirgi kunga kelib, 89 nafar jabrlanuvchi qayd etilgan, ulardan 40 nafari aniqlangan.
Qurbonlarning aksariyati shikoyat bilan murojaat qilgan bo‘lsa-da, hozircha rasman da’vogar sifatida chiqmagan. Prokuratura jabrlanuvchilar ro‘yxati to‘liq emasligini va ularning soni ko‘proq bo‘lishi mumkinligini ta’kidladi.
Tergov rahbari jabrlanuvchilarni imkon qadar tezroq guvohlik berishga chaqirdi. Shuningdek, prokuror 1993 yilgacha sodir etilgan jinoyatlar bo‘yicha da’vo muddati o‘tganini eslatdi.
Biroq jabrlanuvchilarning tergovga yordam berishi va voqealarni aniqlashda o‘z hissasini qo‘shishi muhim ekanligi qayd etildi. Tergov davomida ushbu shaxsning yana ikki nafar inson o‘limiga aloqadorligi ham o‘rganilmoqda.
U 1974 yilda saraton kasalligidan aziyat chekkan onasini, 1992 yilda esa 90 yoshli ammasini yostiq bilan bo‘g‘ib o‘ldirganini tan olgan.
