Marko Rubio: "Chegaralarsiz dunyo" g‘oyasi o‘zini oqlamadi

AQSh davlat kotibi Marko Rubio Myunxen xavfsizlik konferensiyasida chiqish qilib, global tartibni ustuvor qo‘yish va "chegaralarsiz dunyo" g‘oyasi amalda o‘zini oqlamaganini ta’kidladi. Bu haqda Zamin.uz xabar berdi.

Uning so‘zlariga ko‘ra, AQSh Yevropaning kuchli va mustaqil bo‘lishidan manfaatdor. Rubio G‘arb mamlakatlarida ommaviy migratsiya misli ko‘rilmagan darajaga yetganini qayd etib, bu jarayon jamiyat birdamligi va davlatlarning kelajagiga jiddiy tahdid solayotganini aytdi.

Shuningdek, u AQSh va uning ittifoqchilari suverenitetning bir qismini xalqaro institutlarga topshirib, ijtimoiy xarajatlarga ustuvorlik bergani sababli mudofaa salohiyatini yetarli darajada rivojlantira olmaganini ta’kidladi. Davlat kotibi Birlashgan Millatlar Tashkilotining imkoniyatlari katta bo‘lsa-da, hozirgi dolzarb muammolarni hal qilishda samarali yechimlar taklif qila olmayotganini tanqid qildi.

Jumladan, BMT Ukrainadagi mojaroni to‘xtatishga muvaffaq bo‘lmagani, bu boradagi muzokaralar asosan AQSh vositachiligida amalga oshirilgani aytib o‘tildi.