Antarktikada ilk bor katta akula tasvirga olindi

Avstraliyalik olimlar ilk bor Antarktika hududi suvlarida katta akulani tasvirga olishga muvaffaq bo‘lishdi. Bu haqda Zamin.uz xabar berdi.

Yirtqich baliq Janubiy Shetland orollari yaqinida, taxminan 490 metr chuqurlikda joylashgan tadqiqot uskunasiga o‘rnatilgan kamera orqali qayd etilgan. Ushbu ma’lumotni Associated Press axborot agentligi xabar qildi.

Ekspeditsiya ishtirokchisi, tadqiqotchi Alan Jeymisonning so‘zlariga ko‘ra, olimlar bu hududda akula yashashini kutishmagan. “Oldin Antarktikada akulalar yashay olmaydi, degan fikr mavjud edi.

Ammo bu juda yirik, uzunligi 3–4 metr bo‘lgan akula bo‘lib chiqdi”, — deydi u. Ta’kidlanishicha, mazkur akula aslida 2025 yil yanvar oyida tasvirga olingan, biroq ushbu ma’lumotlar yaqinda ochiqlandi.

Olimlar bu yirtqich baliq qutb yoki “uyquchi” akula turiga mansub bo‘lishi mumkinligini taxmin qilishmoqda. Tadqiqotchilarning fikriga ko‘ra, bu akulalar Antarktika chuqur suvlarida kam sonli populyatsiya sifatida yashashi ehtimoldan holi emas.

Ularning oziqlanish manbasi asosan kitlar va ulkan kalmarlarning qoldiqlaridir.