Baykal ko‘lida mikroavtobus cho‘kib, 7 sayyoh halok bo‘ldi

Baykal ko‘lida xitoylik sayyohlar bilan sodir bo‘lgan fojia ehtimoliy sabablari haqida ma’lumot berildi. Bu haqda Zamin.uz xabar berdi.

Dastlabki xabarlarga ko‘ra, voqea Buxanka rusumidagi mikroavtobus haydovchisining xavfli manevri tufayli yuzaga kelgan. Haydovchi muz qatlamlari orasidan tezlik bilan o‘tishga uringan, biroq vaziyatni noto‘g‘ri baholagan.

Natijada avtomobil muzdagi yoriqqa urilib, sirpanib ketgan va cho‘kib ketgan. Avtomobil ichida Xitoydan kelgan to‘qqiz nafar sayyoh bo‘lgan.

Ulardan faqat ikki kishi qochishga muvaffaq bo‘lgan, qolgan yetti nafari halok bo‘lgan. Ma’lum bo‘lishicha, haydovchi yo‘lovchilarni tushirish o‘rniga harakatni davom ettirgan va fojiaga sabab bo‘lgan.

Hodisa Baykal ko‘lida tez-tez sodir bo‘layotgan muammolardan biri ekanligi ta’kidlanmoqda. So‘nggi kunlarda ko‘lda muzga tushib ketgan transport vositalari soni oshgani qayd etilgan.

Avvalgi holatlarda ham kamida ikkita avtomobil cho‘kib ketgan. Shunga qaramay, haydovchilar xavfni inobatga olmay, muz ustida harakatlanishda davom etmoqdalar.

Bu kabi hodisalarning oldini olish uchun xavfsizlik choralari kuchaytirilishi zarurligi aytilmoqda.