Ukraina va Moldova Rossiya boshqaruvidagi jinoiy guruhni fosh etdi
Ukraina va Moldova huquqni muhofaza qilish organlari Rossiya maxsus xizmatlari tomonidan boshqarilgan va taniqli shaxslarni yo‘q qilishni maqsad qilgan jinoiy guruh faoliyatiga barham berdi. Bu haqda Zamin.uz xabar berdi.
Ukraina bosh prokurori Ruslan Kravchenkoning ma’lum qilishicha, ushbu guruh a’zolari “buyurtma” qotilliklar uchun 100 ming AQSH dollarigacha mukofot olishni rejalashtirgan. Mazkur guruh a’zolari o‘zlarini kurer sifatida ko‘rsatib, sayyoh niqobida harakat qilgan.
Ukraina va Moldovada jami 10 nafar gumonlanuvchi qo‘lga olingan. Ular orasida guruh yetakchisi bo‘lgan, ilgari Rossiyada qamoq jazosini o‘tagan 34 yoshli Moldova fuqarosi ham bor.
Jinoyatchilar Google Maps orqali qurbonlarning yashash va dam olish manzillarini aniqlab, Rossiyadagi kuratorlariga hisobot berib turgan. Tezkor tadbirlar davomida 20 dan ortiq tintuv o‘tkazilib, ko‘plab qurol-yarog‘, portlovchi moddalar va aloqa vositalari musodara qilingan.
Ma’lum bo‘lishicha, guruhning asosiy nishonlari orasida taniqli jurnalist Dmitriy Gordon, Ukraina Mudofaa vazirligi Bosh razvedka boshqarmasi vakili Andrey Yusov, strategik davlat korxonalari rahbarlari va “Xorijiy legioni” harbiylari bo‘lgan. Ushbu suiqasdlardan ko‘zlangan maqsad jamoatchilikda qo‘rquv va vahima uyg‘otish, ijtimoiy portlash va mamlakat ichida tartibsizlik keltirib chiqarish edi.
Hozirda gumonlanuvchilarga nisbatan og‘ir jinoiy moddalar bo‘yicha ish ochilgan va tergov ishlari olib borilmoqda. Shunday vaziyatlarda oddiy fuqarolarning hushyorligi va xavfsizlik organlari bilan hamkorligi juda muhim ahamiyatga ega.
