Kasl-Pikdagi qor ko‘chkisi: 9 chang‘ichi halok bo‘ldi
Kaliforniyaning Kasl-Pik tog‘ida yuz bergan qor ko‘chkisi oqibatida bedarak yo‘qolgan to‘qqizinchi chang‘ichining jasadi topildi. Bu haqda Zamin.uz xabar berdi.
Hodisa natijasida jami 15 kishi qor ostida qolgan edi. Qutqaruvchilar tomonidan to‘rt nafar erkak va ikki nafar ayol tirik holda qutqarib olindi.
Afsuski, qolgan to‘qqiz nafar chang‘ichi halok bo‘lgani ma’lum qilindi. "The New York Times" nashrining xabar berishicha, ko‘chki 17-fevral kuni yuz bergan.
Qutqaruvchilar olti kishini smartfonlaridagi SOS funksiyasi orqali yordam so‘raganidan so‘ng topib, qutqarishga muvaffaq bo‘lishgan. Omon qolganlar qutqaruvchilarga uch nafar qurbonning jasadi topilgan joyni ko‘rsatib bergan.
Keyinchalik yana besh nafar chang‘ichining jasadi aniqlangan. To‘qqizinchi qurbonning jasadi esa qidiruv ishlari boshlanganidan bir hafta o‘tib topilgan.
Qidiruv-qutqaruv ishlari og‘ir va murakkab sharoitlarda olib borilgan. Ma’lum bo‘lishicha, barcha 15 kishi Kasl-Pik tog‘ida sayohatni yakunlayotgan guruh a’zolari bo‘lgan.
Ular orasida to‘rt nafar professional gid hamda ushbu hududga tez-tez kelib turadigan do‘stlar guruhi bo‘lgan. Hududda kuchli qor bo‘roni kutilayotgani va ko‘chki xavfi yuqori ekani haqida sayohat boshlanishidan oldin ogohlantirish berilgan.
Shunga qaramay, guruh sayohatni davom ettirgan. Bu hodisa yovvoyi tabiat sharoitida xavfsizlik choralariga qat’iy rioya qilish zarurligini yana bir bor eslatadi.
