Avstraliya Bosh vaziri xavfsizlik tahdidi sabab evakuatsiya qilindi
Avstraliya Bosh vaziri Entoni Albaneze Kanberra shahridagi rasmiy qarorgohidan xavfsizlikka doir jiddiy tahdid sababli shoshilinch ravishda evakuatsiya qilindi. Bu haqda Zamin.uz xabar berdi.
Mahalliy manbalarga ko‘ra, evakuatsiya qaroriga bino ichiga portlovchi moslama qo‘yilgan bo‘lishi mumkinligi haqida kelib tushgan qo‘ng‘iroq sabab bo‘lgan. ABC telekanali xabariga ko‘ra, tahdid to‘liq bartaraf etilguniga qadar Bosh vazir maxsus qo‘riqlanadigan xavfsiz xonada bir necha soat davomida saqlangan.
Shu vaqt ichida huquq-tartibot idoralari tomonidan binoda keng qamrovli tekshiruv ishlari olib borilgan. Natijada hech qanday shubhali buyum yoki portlovchi moslama topilmagan.
Avstraliya politsiyasining rasmiy bayonotida hozirgi paytda jamoat xavfsizligiga hech qanday real tahdid yo‘qligi ta’kidlangan. Shunga qaramay, hodisa sabablari yuzasidan qo‘shimcha tergov ishlari davom ettirilayotgani ma’lum qilindi.
