Orol tubida saksovul ekilib, ekologiya tiklanmoqda
25-fevral kuni "Orol maktabi" ishtirokchilari BMT Taraqqiyot dasturining "Yashil Orol dengizi" tashabbusi doirasida Orol dengizining qurib qolgan hududida saksovul ko‘chatlarini ekish ishlarida qatnashdilar. Bu haqda Zamin.uz xabar berdi.
Bu haqda ACDF matbuot xizmati xabar berdi. Iqlim o‘zgarishidan eng ko‘p zarar ko‘rgan hududlardan birida o‘tkazilgan mazkur tashabbusda ishtirokchilar atrof-muhit mutaxassislari va tajribali mentorlar bilan birgalikda ishladilar.
Ular yerlarni tiklash va ekologik muvozanatni saqlashga o‘z hissalarini qo‘shdilar. Ma’lum qilinishicha, ekilgan har bir saksovul ko‘chati hududda sho‘r-chang bo‘ronlariga qarshi tabiiy to‘siq bo‘lishi bilan birga, tuproqni mustahkamlashga va ekotizimning uzoq muddatli barqaror tiklanishiga xizmat qiladi.
BMT Taraqqiyot dasturi, ACDF va "Orol maktabi"ning qo‘shma sa’y-harakatlari natijasida Orol dengizining qurigan tubida 90 ming gektar maydonga saksovul hamda boshqa galofit turlari ko‘chatlarini ekish rejalashtirilgan. Ushbu loyiha hududning ekologik holatini yaxshilash va kelajak avlodlar uchun barqaror muhit yaratishga qaratilgan.
