Uzluksiz o‘yin o‘ynash talabaning hayotiga zomin bo‘ldi

Tayvanda yashovchi bir talaba uzluksiz to‘rt kun davomida kompyuter o‘yinlari bilan shug‘ullanganidan so‘ng og‘ir ahvolga tushib, hayotdan ko‘z yumgani haqida xabar berildi. Bu haqda Zamin.uz xabar berdi.

Ma’lumotlarga ko‘ra, bu talaba to‘rt kun va uch kecha davomida deyarli tanaffus qilmasdan o‘yin bilan band bo‘lgan. To‘rtinchi kechada talaba hojatga turmoqchi bo‘lgan paytda qattiq og‘riqdan qichqirib, hushidan ketgan.

Shifokorlar uning miyasidagi arteriya yorilib, kuchli qon ketishini aniqlashgan. Talabaning onasi bir necha bor o‘g‘lini kompyuterni o‘chirib, dam olishga undagan, lekin bu ogohlantirishlar natija bermagan.

Hodisadan so‘ng talaba bir necha oy davomida koma holatida qolgan. Keyinchalik oila a’zolari uning hayotini saqlab turgan tibbiy uskunalardan voz kechishga qaror qilishgan.

Mutaxassislar uzoq vaqt tanaffussiz kompyuter o‘yinlari bilan shug‘ullanish salomatlik uchun jiddiy xavf tug‘dirishi mumkinligini ta’kidlashmoqda. Uzoq muddatli kompyuter o‘yinlari inson organizmiga zarar yetkazishi mumkin, shuningdek, miya va yurak faoliyatiga salbiy ta’sir ko‘rsatishi ehtimoldan xoli emas.

Shu sababli, mutaxassislar muntazam tanaffus qilish va dam olishni tavsiya etishadi.