Naxichevanga dron hujumi: Ozarbayjon Eronni qoraladi

5 mart kuni Ozarbayjonning Naxichevan Muxtor Respublikasi hududiga dronlar orqali hujum qilingani haqida xabar tarqaldi. Bu haqda Zamin.uz xabar berdi.

Ma'lumotlarga ko'ra, bu uchuvchisiz qurilmalar Eron hududidan uchirilgan. Xabarlarda aytilishicha, dronlardan biri Naxichevan xalqaro aeroporti terminal binosiga tushib, portlash sodir bo'lgan.

Ikkinchi qurilma esa Bobek tumanidagi Shekerabad qishlog'ida maktab yaqiniga tushgani qayd etilgan. Ushbu hodisa natijasida aeroport binosiga zarar yetgan, ikki nafar tinch aholi vakili jarohat olgan.

Voqea joyiga o‘t o‘chiruvchilar va tez tibbiy yordam guruhlari jalb qilingan. Ozarbayjon Tashqi ishlar vazirligi bu hujumni qat'iy qoralab, uni xalqaro huquq normalariga zid deb baholadi.

Shu munosabat bilan Eronning Bokudagi elchisi vazirlikka chaqirilgan. Bokuda Tehrondan hodisa yuzasidan izoh berishni va bunday holatlar takrorlanmasligi uchun tezkor choralar ko‘rishni talab qildi.

Shu bilan birga, Ozarbayjon zarur hollarda javob choralarini ko‘rish huquqini saqlab qolishini bildirgan.