BMT Erondagi maktab hujumini xolisona tekshirishga chaqirdi
Birlashgan Millatlar Tashkiloti inson huquqlari bo‘yicha oliy komissari idorasi Eronda maktabda sodir bo‘lgan hujumni xolisona tekshirishga chaqirdi. Bu haqda Zamin.uz xabar berdi.
Oliy komissarning matbuot kotibi Ravina Shamdasanining aytishicha, hujumni amalga oshirganlar tekshirishni o‘tkazish va uning natijalarini jamoatchilikka e’lon qilish uchun javobgardir. Shuningdek, aybdorlarni jazolash va qurbonlarga tovon puli to‘lash zarurligi ta’kidlandi.
BMT inson huquqlari bo‘yicha oliy komissari AQSH va Isroilning Eronga qarshi harbiy harakatlari fuqarolar infratuzilmasi va tinch aholiga salbiy ta’sir ko‘rsatishi mumkinligidan xavotir bildirdi. Shu munosabat bilan xalqaro gumanitar huquq talablariga qat’iy rioya etish zarur.
Minob tumanidagi "Shajarayi Toyyiba" maktabi 28 fevral kuni dars vaqtida bombardimon qilingan. Hujum oqibatida ko‘plab o‘quvchi va o‘qituvchilar halok bo‘ldi, maktab binosi esa jiddiy vayron bo‘ldi.
Eron davlat ommaviy axborot vositalarida hodisa natijasida ko‘plab bolalar halok bo‘lgani haqida ma’lumotlar berilgan. YUNESKO bu voqeani xalqaro gumanitar huquqning qo‘pol buzilishi sifatida qoraladi.
AQSH mudofaa vaziri esa Amerika armiyasi fuqaroviy obyektlarga zarba bermasligini ta’kidlab, hodisa bo‘yicha tekshiruv olib borilayotganini ma’lum qildi.
