Qozog‘iston bayrog‘i dunyoning eng chiroyli bayrog‘i deb topildi
Reddit foydalanuvchilari tomonidan tashkil etilgan “Dunyo bayroqlari turniri” onlayn musobaqasining yakuniga ko‘ra, Qozog‘iston bayrog‘i dunyodagi eng chiroyli davlat bayrog‘i deb tan olindi. Bu haqda Zamin.uz xabar berdi.
Bu haqda “Kazinform” axborot agentligi xabar berdi. Musobaqa davomida ishtirokchilar eng yaxshi davlat bayrog‘ini aniqlash uchun ovoz berishdi.
Final bosqichida Qozog‘iston bayrog‘i Kiribati bayrog‘ini ortda qoldirib, birinchi o‘rinni egalladi. Butan bayrog‘i esa musobaqada uchinchi pog‘onani qo‘lga kiritdi.
Turnir tashkilotchilari o‘z izohlarida “Qozog‘iston g‘olib bo‘ldi. Sizlar ovoz berib, bu bayroqni eng go‘zali deb tanladingiz,” deb qayd etishdi.
Musobaqa “pley-off” tizimida o‘tkazildi. Har bir bosqichda ishtirokchilar turli davlat bayroqlarini taqqoslab, ovoz berish orqali g‘olibni aniqlashdi.
Turnirda dunyoning ko‘plab davlat bayroqlari qatnashdi. Shuningdek, turnirda Seyshel orollari, Buyuk Britaniya, Braziliya, Shri-Lanka, Yamayka hamda Papua-Yangi Gvineya bayroqlari ham kuchli ishtirokchilar qatoriga kirib, final bosqichlariga yetib bordi.
Ushbu musobaqa bayroqlar madaniyatini yanada kengroq targ‘ib etishga xizmat qildi.
