AQSH beshta davlatni yadroviy tahdid ro‘yxatiga kiritdi
Amerika Qo‘shma Shtatlari rasmiy ravishda Rossiya, Xitoy, Eron, Shimoliy Koreya va Pokistonni yadroviy qurol bilan hujum qilishga qodir davlatlar ro‘yxatiga kiritdi. Bu haqda Zamin.uz xabar berdi.
Bu haqda AQSH hukumati razvedka hamjamiyati tomonidan tayyorlangan yillik hisobotda ma’lum qilindi. Hisobotda aytilishicha, mazkur davlatlar nafaqat yadroviy qudratga ega, balki an’anaviy jangovar qudratni ham rivojlantirishda davom etmoqda.
Ular ilg‘or va an’anaviy raketalarni tadqiq qilib, ishlab chiqish bilan shug‘ullanmoqda. Razvedka hamjamiyati taxmin qilishicha, 2035-yilga kelib AQSHga nisbatan tahdid soluvchi raketalar soni 16 mingdan oshishi kutilmoqda.
Bu hozirgi 3 mingdan yuqori bo‘lgan darajadan sezilarli darajada ko‘pdir. Shimoliy Koreya butun AQSH hududiga yetadigan qit’alararo ballistik raketalarni sinovdan muvaffaqiyatli o‘tkazdi.
Hisobotda shuningdek, Xitoy, Eron, Shimoliy Koreya, Pokiston va Rossiya davlatlari ilg‘or raketalarga ustuvor ahamiyat berishda davom etayotgani qayd etilgan. Razvedka hamjamiyati Rossiyani “Arktikadagi asosiy muammo” deb atadi.
Hisobotda Moskva mintaqadagi manfaatlarini ilgari surish uchun global raqobatni faol qo‘llab-quvvatlayotgani ta’kidlangan. Rossiya Arktikada dengiz savdosini rivojlantirish, tabiiy resurslarni qazib olish hamda harbiy faoliyat orqali o‘z mavjudligini kengaytirishga intilmoqda.
Xitoy esa Arktikada strategik va iqtisodiy manfaatlarini rivojlantirishda Rossiya bilan munosabatlarni asosiy vosita sifatida foydalanmoqda. Bu esa mintaqadagi global raqobatni yanada murakkablashtirmoqda.
Bundan tashqari, AQSH prezidenti Donald Tramp mamlakat milliy xavfsizligini ta’minlash uchun Grenlandiyaga e’tibor qaratish zarurligini ta’kidladi. Uning fikricha, agar bu hudud nazoratdan chiqib ketsa, uni Rossiya yoki Xitoy nazorat ostiga olishi mumkin, bu esa strategik jihatdan jiddiy tahdid hisoblanadi.
Hisobot va prezidentning bayonoti Amerika hamda global xavfsizlik masalalarini muhokama qilayotgan mutaxassislar uchun muhim signal hisoblanadi. Ushbu holat nafaqat AQSH siyosatiga, balki butun dunyodagi harbiy va geosiyosiy vaziyatga ham ta’sir ko‘rsatadi.
