AQSh va Isroil Natanzdagi yadro majmuasiga zarba berdi
Eron Atom energiyasi tashkiloti ma’lumotiga ko‘ra, 21 mart kuni AQSh va Isroil Natanzdagi uranni boyitish majmuasiga yangi zarba berdi. Bu haqda Zamin.uz xabar berdi.
AQSh va Isroil rasmiylari bu da’voga hozircha izoh bermadi. Eron rasmiylari o‘tkazilgan texnik tekshiruv natijasida radioaktiv moddalar tarqalmaganini va obyekt yaqinida yashovchi aholi uchun xavf yo‘qligini aniqlaganini bildirdi.
Bu haqda Dw.com sayti xabar berdi. Eronning yadro agentligi ushbu zarbani xalqaro qonun va majburiyatlarga, jumladan Yadro qurolini tarqatmaslik to‘g‘risidagi shartnomaga zid deb atadi.
Tehron Xalqaro atom energiyasi agentligini (MAGATE) hujum haqida xabardor qilganini ma’lum qildi. MAGATE esa obyekt atrofida radiatsiya darajasi oshgani aniqlanmaganini va vaziyatni o‘rganishni davom ettirayotganini bildirdi.
Isfahon viloyatida, Tehrondan taxminan 250 kilometr janubda joylashgan Natanz majmuasi Eronning eng muhim yadro obyektlaridan biridir. Bu majmua yer usti va yer ostidagi boyitish inshootlarini hamda 10 mingdan ortiq sentrifugalarni o‘z ichiga oladi.
MAGATE ilgari Natanzdagi uran 60 foizgacha boyitilganini ma’lum qilgan, bu ko‘rsatkich atom energetikasi uchun odatda kerak bo‘ladigan 3-5 foizdan ancha yuqori, ammo qurol darajasidagi 90 foizdan past hisoblanadi. Mazkur obyekt 2025 yil yozida AQSh tomonidan amalga oshirilgan zarbalarda ham nishonga olingan.
O‘shanda yer ustidagi sentrifugalar yo‘q qilingani xabar qilingan, ammo yer osti qismlarining zarar ko‘rganligi aniq bo‘lmagan. So‘nggi hujum esa fevral oxiridan beri kuchayib borayotgan mintaqaviy mojaro fonida sodir bo‘ldi.
Ushbu mojaro doirasida Eron va uning raqiblari Yaqin Sharq bo‘ylab o‘zaro zarbalar almashmoqda.
