Mujtaba Xominaiyning ko‘rinmasligi rahbarlik qobiliyatiga shubha tug‘dirmoqda

Axios agentligining xabariga ko‘ra, Ali Xominaiyning o‘g‘li Mujtaba Xominaiyning jamoatchilik oldida ko‘rinmasligi uning rahbarlik qobiliyatiga nisbatan jiddiy shubhalarni keltirib chiqarmoqda. Bu haqda Zamin.uz xabar berdi.

Manbalarning ta’kidlashicha, u so‘nggi paytlarda omma oldida deyarli yuz ko‘rsatmagan, bu esa savollarni yanada kuchaytirmoqda. AQSH va Isroil tomonidan harbiy harakatlar boshlangandan beri Mujtaba ko‘zga tashlanmayapti.

U 12 mart kuni xalqqa murojaatini o‘zi emas, balki boshqa shaxs orqali o‘qib eshittirgan. Shuningdek, 20 mart kuni yana bir murojaat qilinsa-da, u ham yozma shaklda taqdim etilgan.

Manbalarga ko‘ra, AQSH va Isroil maxsus xizmatlari Mujtabaning Navro‘z bayrami munosabati bilan jonli chiqish qilishini kutgan, ammo bu umid oqlanmadi va faqat matnli bayonot bilan chegaralandi. Bu holat vaziyatga nisbatan ko‘proq shubhalarni yuzaga keltirdi.

Isroilning yuqori martabali amaldorlaridan biri “U haqiqatan ham qarorlar qabul qilayaptimi yoki yo‘q, bunga oid aniq dalillar yo‘q” deya fikr bildirdi. Yana bir manba esa bu vaziyatni juda g‘alati deb baholadi.

Manbalardan biri eronliklar uni oliy yetakchi sifatida tanlash uchun katta qadamlar qo‘yishi ehtimoli kamligini aytmoqda. Shuningdek, uning mamlakat boshqaruvida faol ishtirok etayotganini tasdiqlovchi aniq faktlar ham mavjud emas.

Shu sababli, CIA tomonidan tarqatilgan so‘nggi suratlar va ma’lumotlarni tekshirish ishlari davom etmoqda. Ayni paytda, Mas’ud Pizishkiyon xalqqa videomurojaat bilan chiqishi qayd etilmoqda.

Bu esa davlat rahbariyatida boshqa yo‘nalishlarda faoliyat davom etayotganini ko‘rsatadi. Manbalardan biri “Biz uni kamida bir marta jonli ko‘rishni istardik, ammo u ko‘rinmadi va bu jiddiy xavotir uyg‘otadi” deb xulosa qildi.

Reuters agentligi oldinroq Mujtaba Xominaiyning mart oyining boshlarida bo‘lgan hujumda yengil jarohat olgani haqida xabar bergan edi. The Telegraph ma’lumotiga ko‘ra, u hujumdan biroz oldin bog‘da sayr qilgani sababli og‘ir jabrlardan omon qolgan.

Eron rasmiylari ham uning jarohatlanganini tan olgan, biroq jarohatlar jiddiy emasligini va hayoti xavf ostida emasligini ta’kidlamoqda. Umuman olganda, Mujtaba Xominaiyning atrofidagi noaniqliklar va uning jamoatchilik oldida ko‘rinmasligi Erondagi siyosiy jarayonlarning kelajagi haqida yangi savollarni yuzaga keltirmoqda.

Bu vaziyat nafaqat mamlakat ichida, balki xalqaro miqyosda ham diqqat markazida qolmoqda.