Uganda generali Turkiyadan milliard dollar va kelin talab qildi
Uganda prezidentining o‘g‘li va mamlakat mudofaa kuchlari generali Muxoozi Kaynerugaba navbatdagi shov-shuvli bayonoti bilan xalqaro jamoatchilik e’tiborini tortdi. Bu haqda Zamin.uz xabar berdi.
India Today nashrining xabar berishicha, general ijtimoiy tarmoqlardagi sahifasida Turkiya manziliga o‘ta kutilmagan va g‘ayritabiiy talablarni ilgari surgan. U Turkiya davlatidan bir milliard dollar miqdorida mablag‘ hamda mamlakatdagi eng go‘zal ayolni xotinlikka berishni talab qilgan.
Garchi bu xabar qisqa vaqt ichida o‘chirib tashlangan bo‘lsa-da, internet tarmog‘ida keng muhokamalarga sabab bo‘ldi. General Kaynerugaba o‘z chiqishlarida Turkiyaning Somali bilan olib borayotgan iqtisodiy hamkorligini keskin tanqid qilgan.
Uning fikricha, Turkiya Somali hududida amalga oshirilayotgan loyihalardan ortiqcha daromad ko‘rmoqda va bu foydadan Ugandaga ham dividendlar ajratilishi kerak. General o‘z talablari bajarilmagan taqdirda, ikki davlat o‘rtasidagi diplomatik aloqalarni uzish hamda Turkish Airlines aviakompaniyasining Uganda havo hududidagi parvozlarini taqiqlash bilan tahdid qildi.
Ta’kidlash joizki, Muxoozi Kaynerugaba uchun bunday keskin va g‘ayrioddiy bayonotlar yangilik emas. U avval ham qo‘shni Keniya poytaxtini qisqa muddatda egallab olishi mumkinligi haqida gapirib, katta siyosiy mojaroni keltirib chiqargan edi.
O‘sha vaziyatda Uganda prezidenti o‘z o‘g‘lining nomidan rasman uzr so‘rashga majbur bo‘lgan. Shuningdek, general AQSH va Isroilning Eronga qarshi harakatlarida Uganda Isroil tomonida turib jang qilishga tayyorligini ham ta’kidlagan edi.
Mutaxassislarning fikricha, generalning bu kabi o‘ylamay qilingan bayonotlari Uganda tashqi siyosati uchun jiddiy xavf tug‘dirmoqda va xalqaro maydondagi nufuziga salbiy ta’sir ko‘rsatmoqda. Hozircha Uganda rasmiy doiralari mazkur voqea yuzasidan aniq bir bayonot bergani yo‘q.
