Uganda generali Turkiyadan milliard dollar va kelin talab qildi
Uganda prezidentining o‘g‘li va mamlakat mudofaa kuchlari generali Muxoozi Kaynerugaba Turkiyaga nisbatan kutilmagan hamda bahsli bayonot bilan chiqdi. Bu haqda Zamin.uz xabar berdi.
India Today nashrining xabar berishicha, general ijtimoiy tarmoqdagi sahifasida Turkiya davlatidan bir milliard dollar miqdorida mablag‘ va mamlakatdagi eng go‘zal ayolni xotinlikka berishni talab qilgan. Ushbu noodatiy post qisqa vaqt ichida keng muhokamalarga sabab bo‘lgach, muallif tomonidan o‘chirib tashlangan.
Kaynerugaba o‘z da’volarida Turkiyaning Somali bilan olib borayotgan iqtisodiy hamkorligini tanqid qilib, ushbu jarayondan Ugandaga ham dividendlar ajratilishi kerakligini ta’kidlagan. General agar uning talablari bajarilmasa, ikki davlat o‘rtasidagi diplomatik aloqalarni uzish hamda Turkish Airlines aviakompaniyasining parvozlarini taqiqlash bilan tahdid qilgan.
Ma’lumki, Uganda Somali hududida faoliyat yuritayotgan terrorchilik guruhlariga qarshi kurashda ishtirok etib kelmoqda va general bu xizmatlari evaziga iqtisodiy manfaatlar kutayotganini yashirmagan. Bu generalning birinchi marta shov-shuvli bayonot berishi emas.
U 2022 yilda Keniya poytaxtini qisqa muddatda bosib olishi mumkinligini aytib, katta siyosiy mojaroni keltirib chiqargan edi. O‘sha vaziyatda Uganda prezidenti o‘z o‘g‘lining nomidan rasman uzr so‘rashga majbur bo‘lgan.
Shuningdek, Kaynerugaba xalqaro siyosatda ham o‘ziga xos qarashlari bilan ajralib turadi. Masalan, u AQSH va Isroilning Eronga qarshi harakatlarida Uganda Isroil tomonida turib harbiy amaliyotlarda qatnashishga tayyor ekanini bildirgan edi.
Umuman olganda, Muxoozi Kaynerugabaning bayonotlari xalqaro maydonda ko‘pincha keskin reaksiyalarga va tushunmovchiliklarga sabab bo‘lmoqda. Uning diplomatik etika qoidalariga zid keluvchi bunday chiqishlari Uganda tashqi siyosatiga nisbatan jiddiy savollarni yuzaga keltirmoqda.
Siyosatshunoslar generalning bu kabi xatti-harakatlari davlatlararo munosabatlarga salbiy ta’sir ko‘rsatishi mumkinligidan xavotir bildirishmoqda. Hozircha Uganda hukumati yoki Turkiya tomoni ushbu voqea yuzasidan rasmiy munosabat bildirmadi.
