Eron armiyasi hududiga kirishga urinayotgan kuchlarni qattiq ogohlantirdi
Eron armiyasi rasmiy vakili mamlakat hududiga quruqlik orqali kirib kelishga urinadigan har qanday kuchlarga nisbatan qatiy ogohlantirish berdi. Bu haqda Zamin.uz xabar berdi.
Uning ta’kidlashicha, Qurolli kuchlar bosh qo‘mondoni Amir Xotamiyning ko‘rsatmalariga binoan, bunday harakatlar sodir etgan tomonga nisbatan eng qattiq choralar ko‘riladi. Eron tomoni o‘z pozitsiyasini aniq belgilab, hech bir bosqinchi tirik qoldirilmasligini ma’lum qildi.
Shuningdek, bayonotda Isfahon viloyatining janubiy hududlariga Amerika Qo‘shma Shtatlari tomonidan kirib kelishga urinish amalga oshirilgani aytildi. Eron harbiy idoralari ushbu xavfli harakat o‘z vaqtida aniqlanganini va bartaraf etilganini bildirdi.
Ma’lumotlarga ko‘ra, operatsiya davomida Eron qurolli kuchlari qarshi hujum uyushtirgan va natijada raqib tomon chekinishga majbur bo‘lgan. Xabarlarga ko‘ra, to‘qnashuv paytida C-130 turidagi harbiy samolyot nishonga olingan.
Afsuski, ushbu voqea oqibatida Eron armiyasi to‘rt nafar xizmatchisini yo‘qotgan. Halok bo‘lganlar orasida general va havo mudofaasini boshqaruvchi mutaxassislar bilan birga harbiy o‘quv yurti qo‘mondoni Mas’ud Zarey ham borligi tasdiqlandi.
Eron rasmiylari vafot etgan harbiylarning jasorati va vatan oldidagi xizmatlarini yuqori baholab, ularni shahidlar qatoriga qo‘shganini e’lon qildi. Hozirgi vaqtga qadar Amerika Qo‘shma Shtatlari tomonidan ushbu voqea yuzasidan hech qanday rasmiy munosabat bildirilgani kuzatilmayapti.
Siyosiy tahlilchilarning fikricha, bunday keskin bayonotlar va harbiy to‘qnashuvlar mintaqadagi vaziyatni yanada og‘irlashtirishi hamda keng ko‘lamli qarama-qarshiliklarning boshlanishiga sabab bo‘lishi mumkin.
