Tezlik datchiklaridagi nosozlik tufayli Avstriyada aviareys bekor qilindi
Avstriyada kutilmagan va bir qarashda juda oddiy ko‘ringan holat tufayli butun bir aviareys bekor qilindi. Bu haqda Zamin.uz xabar berdi.
Ushbu voqea haqida Aero Inside nashri xabar berdi. Hodisa Insbruk aeroportida yuz bergan.
Austrian Airlines aviakompaniyasiga tegishli samolyot Venaga uchish uchun tayyorgarlik ko‘rayotgan edi. Yo‘lovchilar bortga joylashib bo‘lgach, parvoz uchun barcha zarur choralari yakunlandi va samolyot yo‘lga chiqdi.
Layner uchish yo‘lagida tezlikni oshirayotgan va soatiga taxminan 150 kilometr tezlikka yetgan vaqtda ekipaj kutilmagan muammoga duch keldi. Tezlikni o‘lchaydigan datchiklar orasida turlicha ko‘rsatkichlar paydo bo‘ldi.
Aviatsiya qoidalariga ko‘ra, bunday farq parvoz xavfsizligi uchun jiddiy xavf tug‘dirishi mumkin. Samolyotda jami 107 nafar yo‘lovchi bo‘lgan.
Xavfsizlik choralari asosida uchuvchilar laynerni zudlik bilan to‘xtatishga qaror qilishdi. Ekipaj ehtimoliy xavfni inkor etmay, reysni bekor qilib, yo‘lovchilarni samolyotdan xavfsiz chiqarib yubordi.
Texnik mutaxassislar nosozlik sababini aniqlash uchun tekshiruv ishlarini boshlashdi. O‘rganishlar davomida havo oqimini o‘lchaydigan muhim datchik ichiga kichik bir ari kirib qolgani ma’lum bo‘ldi.
Aynan shu hasharot qurilma ichida tiqilib qolishi natijasida sensorlar noto‘g‘ri ishlay boshlagan va tezlik haqida xato ma’lumotlar bergan. Mutaxassislarning ta’kidlashicha, ushbu datchik samolyotning xavfsiz parvozi uchun eng muhim tizimlardan biri hisoblanadi.
Shuning uchun eng kichik nosozlik ham jiddiy choralarni ko‘rishga va reysni bekor qilish kabi katta qarorlar qabul qilishga sabab bo‘ladi. Natijada bitta kichik hasharot butun parvoz rejasini buzdi.
