AQSHda Donald Tramp surati tushirilgan yangi banknota chiqarilishi mumkin
Amerika Qo‘shma Shtatlarida mamlakat mustaqilligining 250 yillik to‘yiga tayyorgarlik ko‘rish doirasida o‘ziga xos taklif ilgari surilmoqda. Bu haqda Zamin.uz xabar berdi.
Unga ko‘ra, AQSHning sobiq prezidenti Donald Trampning surati tushirilgan 250 dollarlik yangi banknotani muomalaga chiqarish rejalashtirilmoqda. Ushbu tashabbus nafaqat davlat bayrami bilan bog‘liq, balki mamlakat pul tizimi tarixida ham yangi sahifa ochishi mumkin.
Dastlabki ma’lumotlarga tayanadigan bo‘lsak, yangi kupyuraning dizayni ustida britaniyalik taniqli rassom Ian Aleksander ish olib bormoqda. Banknotada Donald Trampning portreti bilan bir qatorda AQSH davlat bayrog‘ining ranglari va mustaqillik yubileyiga bag‘ishlangan maxsus belgilar aks etishi ko‘zda tutilgan.
Mutaxassislar ushbu loyihani zamonaviy dizayn va milliy qadriyatlar uyg‘unligi sifatida baholamoqda. Ayrim manbalarning ta’kidlashicha, mazkur loyiha maketlari shaxsan Donald Tramp tomonidan ko‘rib chiqilgan va ma’qullangan.
Biroq hozircha bu ma’lumotlar rasmiy doiralar tomonidan tasdiqlangani yo‘q. Shunga qaramay, mazkur yangilik jamoatchilik orasida keng muhokamalarga sabab bo‘lmoqda.
Chunki AQSH qonunchiligi va an’analariga ko‘ra, odatda davlat pullarida hayot bo‘lgan shaxslarning suratlari aks ettirilmaydi. Agar ushbu taklif amalga oshsa va kupyura chop etilsa, Donald Tramp AQSH milliy valyutasida hayotlik chog‘ida surati tushirilgan kam sonli insonlardan biriga aylanadi.
Bu voqea Amerika moliya tizimi uchun ham o‘ziga xos tarixiy tajriba bo‘lishi kutilmoqda. Hozirda ushbu loyihaning huquqiy va iqtisodiy jihatlari mutaxassislar tomonidan o‘rganilmoqda.
Bunday yubiley banknotalarining chiqarilishi ko‘pincha kolleksionerlar va aholi orasida katta qiziqish uyg‘otadi.
